ضعف : قوة

في مواقف في الحياه صعب ننساها لأنها بتتأرخ وعلى اساسها نحدد اوقاتنا

ممكن تكون لحظات فرح ما ينوصف

 وممكن تكون لحظات يأس وحزن 

بس لو كنا شويا مركزين فيها ممكن تتغير حاجات كتير في حياتنا

- 5 -

أنا مزاجيه بطبعي ، كل شي أقيمو حسب مزاجي وطبعا ممكن يعجبني شي في يوم وفي اليوم التاني اقول ، مستحيل كيف كان عاجبني الشي دا أكيد ما كنت بوعيي !!

دا معناه اني اعشق التغيير ، أكره الروتين و حلو لما الواحد يكون بيعشق التغيير، حياتو تكون كلها مفاجآت ومستحيل تكون على نمط واحد ، وأكيد الاشخاص اللي حواليه بيحسوا بالمتعه وأبدا ما يملوا ..

حواري اللي مانسيتو ..

- 4 -

من العلاقات القليله اللي عشتها والي دايما اسمعو من البنات عن علاقاتهم العاطفيه ، في سؤال دايما يخطر على بالي 

متى الشباب يحترموا الحب ؟

على فكره الحب شي مقدس ، وابدا ابدا مو من حقك انك تعتبرو لعبتك ، ولا هوا ابدا شطاره من حضرة جنابك انت وهوا انك تلعب بمشاعر وحده قدّرتك واعتبرتك آدمي وحبتك وسلمتك قلبها ، وعلى فكره ترا الدنيا دواره ومافي شي يضيع ، ولو بتقول انك فعلا تحبها بس مستحيل تكمل معاها ، معليش دا ما يعكس الا ضعفك وانك مو قد الشي اللي بتعملو 

 نجي لنقطه مهمه تانيه ترا لما انت تلعب بمشاعر بنت استحاله انها ماتكون حست بس بتسكت لأنها بتعطيك فرصه وتقدرك للمره التانيه ، يمكن تندم على غلطك وتعوضها عنو 

طبعا دا موضوع واحد من المواضيع الكتير اللي بأناقشها وقت القهوة مع حضرتي 😎

- 3 -

أنا انسانه تحكمني مشاعري ، مهما حاول عقلي يكون سيد الموقف ، مستحيل اعمل شي مشاعري مو موافقه عليه ، وللاسف دا الشي غالبا هوا اللي جايبلي البلا في حياتي ..

انسانه زيي اكيد بتكون نظرتها للحياه رومانسيه خياليه بعيده كتير عن الواقع ، بس بصراحه الشي دا لو ما ضرني أكيد بيعيشني فوق السحب وبين النجوم ، وصدقوني احساس ما يتعوض ابدا ..

من الحاجات اللي اعتبرها مميزه فيا وفي نفس الوقت عيب في شخصيتي اني مستحيل أقدر أضرأو أضايق أحد متعمده إلا في حاله وحده ، لو كان عدو ليا يستمتع بأذيتي ..

والشي دا طبعا بيخليني أنا والمجامله غالبا أصحاب 

عشان تفهموني ...

- 2 -

نسيت أقلكم انو عمري 26 ، وأكيد متخرجه من الجامعه الحمدلله بعد عناء طويييل ، ودي طبعا قصة تانيه يمكن أحكيلكم عنها بعدين ...

وحده بهادا العمر وفي وقتنا دا مستحيل ما تكون مرت بمواقف كتير وعلاقات عاطفيه مختلفه ، وعلى فكره لما أقول علاقات مو شرط اني اكون صايعه وضايعه وعلى حل شعري ، بالعكس الحمدلله أهلي ربوني كويس وعلموني كيف أحمي نفسي من نفسي قبل لا أحميها من اللي حواليا .. 

ربي رزقني بصاحبات زي العسل وأكتر كانوا ومازالوا زي أخواتي ، نفرح سوا ونزعل سوا ، يعني بالمختصر أنا أجتماعيه وابدا مو انطوائيه ..

بس أوقات كتيره أحب أجلس مع نفسي أصفي أفكاري وأعرف اللي ليا واللي عليا ، وانا اسمي حالتي دي التقوقع وأكيد في الوقت دا ما اسامح اي احد يحاول يقتحم قوقعتي وصدفتي الخاصه ..

أنا وقهوتي التركيه وحوارنا الصامت ..

- 1 -

غالبا بعد وجبة الغداء أو العشاء أو أيًا كان اسم الوجبه اللي أكلتها ، واللي دايما تكون الوجبة الوحيده في اليوم ، أشرب قهوتي التركيه اللي بيها أحس يومي يكمل ، ولو مو هيا ما اقدر اتخيل مزاجي كيف بيكون..

في غرفتي وقدام تلفزيوني وعلى الكنبه ، وفي الاضاءه الخفيفه أو الظلام ، وفي يدي فنجان القهوة تبدأ رحلتي مع نفسي ، أي أحد ممكن يشوفني في دي الحاله - دا طبعا لو الباب كان مفتوح - يحسبني منسجمة مع اللي بينعرض في التلفزيون ، بس الحقيقه تقول اني في وادي وتلفزيوني باللي فيه في وادي تاني .....

هادي أنا ..

بسم الله الرحمن الرحيم

اليوم قررت اني أكتب في مدونتي

 ..Bu Benim..

طبعا الاسم بالتركي ومعناه ( هادي أنا ) 

أنا هنا راح أكتب لأني أنا أبغى أكتب ، مو لأني احتاج انتقادك أو استناه ، أكتب لمجرد الكتابه وبس وانتو احرار تتابعوا ولا لأ ..

 ماعندي مانع اقرأ ردودكم وتعليقاتكم 

وأكيد زي مو واضح اني بأكتب بلهجتي العاميه الحجازيه تقريبا